سنتعلم بأسهل إسلوب كيف نرسم على الزجاج والمرآيا والسيراميك
اولا الادوات :
ده بقى أسمه انبوبة الرليف....... أو سائل التحديد وزى ما أحنا شايفين منه اللون الأسود والذهبى والفضى والرصاصى وجميع الألوان..........
وده بقى يا اخوانى أسمه البترون. يعنى عبارة عن الرسم الى سيادتك عايز ترسمه على الزجاج
هتسألنى ازاى يا ام سيف ؟؟؟ هقولك سيادتك تروح لبائع الزجاج وتديله مقاسات اللوحة بتاعتك ويقطعلهالك وترجع البيت تحط الرسمة الى عندك
( الباترون) تحت الزجاج وتظبطه قوى وتثبته من الخلف على الزجاج بالشريط الأصق عشان ما يتحركش ويبوظلك الدنيا........ بقى عندك ايه دلوقتى ؟
قطعة زجاج تحتها الرسمة . وطبعا شايفها .أبدأ حدد الرسم بأنبوبة التحديد ( الريليف)
خلى أديك وهيا بتضغط على الأنبوب متزنة و عمودية بقدر الأمكان وخلى خيط السائل
يكون إندفاعه مستمر وهوا خارج من الأنبوب......بعد لما تنتهى حتلاقى عندك الرسم
بقى على الزجاج بالرليف ... شيل الرسمة من تحت الزجاج .خلاص مش عايزينها
وأبدأ لون وإستمتع ......... أزاى ؟؟؟؟؟؟؟؟؟؟؟؟ أقولك
دى يا جماعة الوان الرسم على الزجاج ..... و تشبه بالظبط ألوان السيراميك وعلى فكرة
نقدر نرسم بألوان السيراميك على الزجاج .........وبألوان الزجاج على السيراميك . أنا بأعمل كده
من زمان . وتقدر ترسم على طقم شاى او طبق صينى أو سيراميك الحمام..زى ماتحب
طقم فرش رسم مقاسات مختلفة . وكمان قطارة . وقطعة
إسفنج...... عيدان خلة . فرشة أسنان وخلافه . أى حاجة تعمل تآثيرات فى ملمس الألوان زوده
من أساليب المحترفين ....... لازم تكون جريء وواثق أنك فنان ومبدع ..........................
دلوقتى بقى عنك الألوان والفرش وخلافه .مستنى أيه .. يالاا ورينا الفن.................
ضع اللون فى بالته ذات العيون التى تستخدم فى الرسم بالألوان المائية أو لون فى طبق خزفى
صغير فى حجم طبق فنجان القهوة.. خف الألوان بالتنر أو السبرتو .......وخلى بالك أن فيه ألوان
بتتخف بالماء لازم تبقى عارف وأنت بتشترى . ألوان تتخف بالماء ولاا بالتنر أو السبرتو . ولا البياع يدبسك ويبعلك ندعة مخفف فى برطمان بالشيىء
الفلانى.خليك واعى......... قبل ما تبدأ
عايز أقولك لو اللوحة زجاج نضع الرسم أسفلها ونحدد بالرليف . طيب لو مرآيا ...........
نحطها على وش المرآيا فرخ كربون فى الوسط ونمشى بالقلم الرصاص
على حدود الرسم . فيطبع على وجه المرآيا .وبعد كده تفوت عليه تانى بس بسائل التحديد
الى هوا الريليف............ اظن أنا ماشية معاكوا تاتا تاتا . عشان ما تقلش حارمك من حاجة
نعيش بقى مع الجمال والأبداع
طقم الشاى اللى قلتلك عليه
فازة ورد سواء كانت زجاج او خزف...... كله شغال عندنا
لوحة جمالية تعلق على الحائط على زجاج شباك
طقم كاسات ما كنش ملون . أوضيف له لمسة جمالية
زمان كنا بنعمل عملية صعبة ودقيقة لحفرمثل هذا الرسم بتسليط عليه تيار من الرمل المضغوط. ودلوقتى بقى حفر ليزر. حدد الرسم
وروح للراجل خليه يحفرهالك باليزر .......
خلى بالك ان ألوان النوافذ تكون شفافة لينفذ منها أكبر قدر من الضوء
رسم على طبق زجاج أوخزف..ألوان زجاج . أو ألوان سيراميك........
فى ألوان تعطى تأثير الأصداف والأحجار الكريمة
والحصى والرخام.وتأثيرات براقة رائعة الجمال
لو في اى سؤال أنا تحت أمركم ......
ملحوظة : انا خريجة زخرفة و انا لقيت الموضوع دا عالنت و عجبنى فانا نسقته و نزلته على منتدى بنت النيل عشان اللى نفسه يرسم على الزجاج
أرجو أن يعجبكم الموضوع ويكون الشرح سهل ......
موضوع: عندما يذوب الضوء عشقاً فى الالوان 
الثلاثاء 30 مارس 2010, 3:07 pm
شكر بموضوعيك الجميل والله اخت جيجي